សាលារាជធានីភ្នំពេញមិនអនុញ្ញាតឱ្យ...... ~ ចំណេះដឹងទូទៅ

សាលារាជធានីភ្នំពេញមិនអនុញ្ញាតឱ្យបណ្តាញយុវជន ហែក្បួនក្នុងទិវាបរិស្ថានពិភពលោកនៅថ្ងៃនេះ

កោះសន្តិភាព

លោកឃួង ស្រេង ក្នុងកិច្ចប្រជុំជាមួយតំណាងបណ្តាញយុវជនកម្ពុជា នៅសាលារាជធានីភ្នំពេញ

រាជធានីភ្នំពេញ ៖ អាជ្ញាធររាជធានីភ្នំពេញមិនអនុញ្ញាតឱ្យបណ្តាញយុវជនកម្ពុជា ធ្វើពិធីដង្ហែក្បួន ចេញពីមុខក្រសួងបរិស្ថាន ទៅក្រសួងកសិកម្ម ដើម្បីរំលឹកខួបលើកទី៤២ ទិវាបរិស្ថានពិភពលោក ដែលគ្រោងធ្វើទ្បើងនៅថ្ងៃទី៥ មិថុនា ទេ តែអាចធ្វើបាននៅទីស្នាក់ការរបស់ខ្លួន ឬចូលរួមជាមួយសាលារាជធានីភ្នំពេញក៏បាន ។

នេះជាការបញ្ជាក់របស់លោក ឃួង ស្រេង អភិបាលរងរាជធានីភ្នំពេញ ក្នុងកិច្ចប្រជុំជាមួយតំណាងបណ្តាញយុវជនកម្ពុជា នៅសាលារាជធានីភ្នំពេញ កាលពីរសៀលថ្ងៃទី៣ មិថុនា បន្ទាប់ពីអង្គការបណ្តាញយុវជនកម្ពុជា បានស្នើសុំធ្វើពិធីខាងលើនេះ ទៅសាលារាជធានីភ្នំពេញ ។ លោក ឃួង ស្រេង បានបញ្ជាក់ថា សាលារាជធានីភ្នំពេញក្នុងដំណាក់កាលនេះ គឺមិនអនុញ្ញាតឱ្យមានការដង្ហែក្បួនអ្វីទ្បើយ ក្នុងន័យនេះមិនមែនជាការបំបិទសិទ្ធិសេរីភាព ឬជារឿងនយោបាយអ្វីនោះទេ ហេតុផលគឺដើម្បីរក្សាសន្តិសុខ សណ្តាប់ធ្នាប់ ការពារការកកស្ទះចរាចរណ៍ក្នុងរាជធានីភ្នំពេញទាំងមូល ។

លោកបានស្នើឱ្យបណ្តាញយុវជនកម្ពុជា និងអង្គការសង្គមស៊ីវិលនានា បើចង់ចូលរួមធ្វើទិវាបរិស្ថាននេះ ពិតប្រាកដ គួរបង្វែរពីការដង្ហែក្បួនទៅជាការចុះប្រមូលសំរាមតាមទី សាធារណៈ ឬរៀបចំវេទិកានៅតាមទីស្នាក់ការ កន្លែងឯកជន ដើម្បីបំផុសឱ្យយុវជន និងប្រជាពលរដ្ឋចូលរួមថែរក្សាបរិស្ថានទាំងអស់គ្នា ។ លោក ទឹម ម៉ាទ្បៃ ប្រធានបណ្តាញយុវជនកម្ពុជាបានឱ្យដឹងថា ទិវានេះធ្វើទ្បើងក្នុងបំណង ដើម្បីជំរុញឱ្យប្រជាពលរដ្ឋចាប់អារម្មណ៍លើផលប៉ះពាល់ និងការបំផ្លាញបរិស្ថានដែលកំពុងធ្វើឱ្យមានការប្រែប្រួល ប៉ះពាល់ដល់ការរស់នៅប្រចាំថ្ងៃរបស់យើងទាំងអស់គ្នា ។

ក្នុងលិខិតរបស់បណ្តាញយុវជនកម្ពុជាដែលបាន ស្នើសុំទៅសាលារាជធានីភ្នំពេញ បានឱ្យដឹងថា បណ្តាញយុវជនកម្ពុជា សហការជាមួយអង្គការដៃគូមួយចំនួន នឹងរៀបចំប្រារព្ធទិវាបរិស្ថានពិភពលោកខួបលើកទី៤២ នៅថ្ងៃទី៥ មិថុនា ឆ្នាំ២០១៤ ដោយមានការជួបជុំគ្នានៅមុខក្រសួងបរិស្ថាន ហើយហែក្បួនចេញទៅក្រសួងកសិកម្ម ដែលពិធីនេះមានអ្នកចូលរួមប្រមាណ៥០០នាក់ ៕